Dhek emben kae
Dakkirimi kembang tebu
Nanging kowe malah mung ngguyu
banjur mecucu wusanane mlayu
padhakna aku wong bar tangi turu
kang arep ngluru, mburu, barang kang kok anggep saru
apa ora kleru sapa kang lucu
dhek wingi uga
dakkirimi kembang kanthil
nanging kowe malah mung mecicil
nggedrug-nggedrugake sikil
karo balangake pentil
dakkira kowe bakal kanthil
jebul malah kenthir
lan dina iki
dakkirimi kembang bangah
jebul kowe malah bungah
ngangah-angah karo nyawurke lemah,
piye ta ki?
O, aku ngerti
sesuk dakgawekne wae kembang lambe
ben saya ngambra-ambra anggonmu nggodhong wuni
yen ngono mengko bakal kewiyak
kowe kuwi isane mung ngecuwis
nganggep wong liya mung arep nguyahi segara
kamangka ora,
ya aku-aku iki mung pengin atur pisungsung
kanggo pepundhenne
kang luwih luhur drajate
e, ya mung kere
apa ta kang bisa kango mere?
Sanggar, 15 April 2007
geguritan ing dhuwur nyeritakake wong sing gaweane celelekan ora isa serius