Katon sumamburat sang diwangkara,
miyak kingkin jroning wardaya
Mung wukir sela kang wanteg,
tan mobah, mosik, apa maneh molah-malih,
nadyan wiramane gangsaran,
keprakane tumanggah,
geneya tetep panggah tanpa wurung,
netepi darmaning atitah
ati karep nanging bandhaku cupet,
esem kecut, rai aclum kesiwal pangucapmu,
kang tanpa taha ngumbar wadining warana jati,
reyah-reyoh nglelingsemi,
keladuk wani tan eling ing wirahsa
Nanging sun ra bisa dora,
ati iki tan bisa selak,
runtiking asmara
tumlawung ing awang-uwung,
tumurun ing rahsa jati,
jati-jatining pemarem
Sanggar Badran, 5 Oktober 2006
(Kapacak ing Kalawarti Djaka Lodang, Sabtu Wage, 7 Maret 2009 Edisi 40)
